dieses Mal mit: Benjamin Benz
Benjamin Benz – «Was hät er mitem FCH z’tue?»
eifach alles…Spieler seit Fussballschule, Trainer, ehem. Eis- und Zwei-Spieler, ehem. Juniorenobmann, Geschäftsführer und neu Cheftrainer der 1. Mannschaft
Alex Spillmann, an wen möchtest Du den Ball weiterkicken für das Juli-Interview? Und warum?
Mich nimmt es sehr wunder, was Beni Benz als neuer «Eis-Trainer» im Sinn hat und wie er das oben gesteckte „Ziel Aufstieg“ erreichen möchte.
Beni, Deine Reaktion auf den Steilpass von Alex?
Da de Alex ganz en passable rechte Fuss hät, hoffi natürlich, dass ich de Steilpass problemlos erlaufe chan. Danke Alex für de Pass, freu mich uf s Interview!
Geben wir die Frage von Alex doch gleich weiter. Was bedeutet Dir die Aufgabe und wie gehst Du Deine neue Funktion in der 1. Mannschaft an?
Trainer sie bim FCH isch sit Jahre mini gross Lideschaft und dass ich jetzt s Eis chan trainiere, bedütet mir enorm viel. Mir isch es wichtig, en super Drive chöne is Team ts bringe und dass ich all, mit minere Art, wie ich dä Fussball läbe, chan mitzieh. Und was mer mit sehr grossem Stolz säge dörf: Jede Spieler i Eis isch i de FCH Junioreabteilig gross worde!
Dein Amt als Geschäftsführer gibst Du bald ab. Was ist Deine schönste Erinnerung an Deine Amtszeit?
Die Frag chani leider unmöglich beantworte. I däne Jahr als Gschäftsfürher, au allgemein i minere Zit bim FCH, han ich so viel unvergässlichi Erinnerige… da isch es schwer eini use ts näh. S Beste am FCH isch für mich scho immer dä Kontakt mit allne FCHler gsi. Dank em FCH han ich sehr viel gueti Mänsche dörfe kenne lerne und das ganze «Mitänander» sowie die soziale Kontäkt, dass sind für mich
die schönste Erinnerige. Ah Mol öppis möchti no usenäh. Als am Grümpi 2019 euse Vereinssong (Herrliberg vo Outback feat. Open Season) im volle Grümpi Zelt live uf de Bühne cho isch und gfühlt de gsamt FCH im Zelt uf de Bänk gstande isch, eifach unbeschrieblich gsi!
Deine schönsten Erlebnisse als Spieler?
Da gits au sehr vieli schöni Erlebnis. Zum Bispiel, wie ich mit 16ni han dörf s erst Mal im Eis mittrainiere und wie ich vom Team, als dazumals Jüngste, ufgno worde bin. Da vo dä zwei Jahrgäng über mir kei Spieler im Eis gsi sind, bin ich da mit chli Abstand de Jüngst gsi und han vor dem ziemlich Respekt gha. Wie mich dänn aber all die Spieler im 1 ufgno händ, isch e unglaublich schöni Erfahrig gsi. Ich han mich sofort wohl gfühlt und s erste Kick-Off Weekend in Tschagguns isch de Hammer gsi. Au es sehr schöns Erlebnis isch de Ufstieg mit em Eis id 2.Liga und de Ufstieg mit em Zwei id 3. Liga gsi. Nach minere Zit im Eis han ich au im Zwei e geniali Zit gha und i mim letzte Spiel hemmer in Bauma e unvergesslichi Ufstiegssause dörfe firre. Zudem au s Jahr im Ba mit em Mäge Sauter als Trainer, wo für eus all e grossi Identifikations-Figur gsi isch. De Mäge het eus im Ba zeigt, was Team- und Vereinslebe bedütet, da han ich sehr viel chöne mitnäh. Natürli all Zuchwil Lager, Grümpis und sustige Events.
Es gibt Stimmen im Verein die finden, dass es doch ausreicht wenn unser Fanion-Team als Dorfclub in der 3. Liga spielst. Wie siehst Du das?
Natürlich reichts us, wenn en Dorfclub i de 3. Liga spielt. D Frag isch doch, was mer will… Eifach sege, dass es doch scho guet isch, wies grad aktuell isch, wäri chli e bequemi Lösig und das bringt eus ned witter… Mis Ziel isch ganz klar s Eis vorwärts ts bringe und mit em Team öppis ts erreiche. Wenn mer gseht, wie viel gueti und vor allem no jungi Fussballer mir bereits i de ganze Aktivabteilig i däne vier
Teams händ und wenn ich au gseh, was da i de nexte 1-2 Jahr no vo de Ba-Juniore zu dä Aktive chunt, hemmer e enormi breiti a guete Fussballer. Da muess es doch euses Ziel sie, mit dem Potenzial öppis ts erreiche. S wichtigscht isch sowieo, dass mir eusne Prinzipie bim FCH treu bliebed und mit eusne eigene Spieler öppis erreiche möchted.
Du bist nun im Seniorenalter. Sieht man Dich bald auch wieder aktiv im Einsatz?
Ja Danke für d Erinnerig as Alter, scho speziell sit zwei Wuche 30gi ts sie. Es wür mich sehr reize bi de 30+ ts spiele. Es isch e richitg cooli Mannschaft mit vielne guete Type. Zudem isch de Dani Meier, zu dem ich sehr en gute Draht han, eine vo zwei Trainer dete. De Dani isch bi de C-und B-Juniore sowie im Zwei min Trainer gsi und er het au zu däne ghört, wo mich dazumals im Eis guet ufgno händ, drum würi da scho Mal no gern dete spiele. Jedoch gilt min Fokus aktuell voll am Eis, aber wenns Mal knapp sind bi 30+, hilfi natürlich gern us.
Inwieweit trifft für Dich der Vereinsspruch „Ä Fründschaft fürs Läbe“ ins Schwarze?
De Slogan beschriebt de FCH perfekt. Ich han dank em FCH sehr vieli sehr wertvolli Fründschaft chöne knüpfe. Und was bi vielne Fründschafte bim FCH so speziell isch, sie sind über Generatione verteilt, wies wohl nur im Verein möglich isch. Unabhängig vom Alter hanis mit sehr vielne bim FCH sehr guet und das trifft wohl ned nur uf mich zue, das schätzed au sehr viel Anderi am FCH. Für viel, mich zu 100% igschlosse, isch de FCH wie e zweiti Familie, was unglaublich wertvoll isch.
Was wünschst Du Dir für den FCH?
Für de FCH wünsch ich mir, dass dä Verein sine Prinzipie und sim Slogan treu bliebt. Dänn chunt das sehr guet und ich freue mich sehr druf, au in Zukunft dörfe en Teil vom Verein ts sie.
An wen möchtest Du den Ball weiterkicken für das August-Interview? Und warum?
Ich kick dä Ball witter an Fabian Staubli. Aber dä Pass dörfi ned scharf spiele, will de Fabian mittlerwille einiges besser mit Tennisbäll als mit em Fussball umgah chan, chönt er dä Pass sust ned verarbeite. Wieso de Fabian. Mit grad Mal zarte 18ni hani bereits zwei Jahr als Trainer vo schwächere F- und E-Teams hinter mir gha und gseit, dass ich als Trainer ufhöre. De Fabian het mich dazumals wuchelang bearbeitet, dass ich s Ea als Trainer übernäh söll, wo no kein Trainer gha het. Irgendwenn het er mich so zermürbt, dass ich für eis Training zugseit han, zum Mal luege wies isch und dass er mich in Rueh laht. Es het mich dänn aber bereits im erste Training so packt, dass ich sie dem Tag liedeschaftlich gärn Trainer bin und das verdanki au am Fabian. Zudem het er mich im 2012 als sin Nachfolger als Junioreobmann am Vorstand empfohle. Witter git de Fabian, vor allem am Didi und mir, immer no viel wertvolli Tipps für dä Verein und er hät sehr gern Mediepräsenz und die Plattform möchti ihm gärn gäh.